نظرات تحتاج لنظرات
Posted on by الكاتبة الأديبة الدكتورة مرفت محرم ـ عضو اتحاد كتاب مصر
نظرات تحتاج لنظرات
فازوره ولا قدرته و بايدينا ولا حكمته
بننولد بعد الشقى بفضله هو و رحمته
و بنمشى نكبر فى الحياة و كل حى و نيته
و لما دورنا ينتهى الكل يدخل تربته
معرفنا ميتنا نجا ولا فى جهنم حضرته
طب وابن آدم بس ليه نفسه ما يترك دنيته و عجبى؟
••
باعوا الهوا مالقوش شارى حتى اللى عايز مدارى
مهُ كل واحد فى الدنيا حداه و عنده و مش دارى
••
فيه لعب اسمه الحلبسه
مافيهش حاسب ولا لسه
اللى يلاعبك له خمسه
و ان كان لك سبعة تاخدهم من ايده مايعدوا الخمسه
قصر الكلام اللعبه دى فيران و وسطيهم بسه
••
قلت للنملة مالك و مالى
طول ما انت واقفة بصالى
لمعايا حاجة حاتكليها ولا شكل أمك يحلالى
قالتلى أنا قاعدة قصادك لاتقومى و تدوسى عيالى
برضه الخَلَف غالى يا هانم و زى ماداكى ادالى
عصفورة وقفت هنا من حبة و أنا قاعد
فضلت تنقر فى صخرة عضمها جامد
هى تنقر تنقر و الحجر عاند
الصخرة قالتلها ايه مقصدك منى اللى يغظنى يدق حديد يكون جامد
••
يا ورد مالك مليان شوك
و الخلق يتمنوا يشموك
ان كنت بخلان ع العالم فى يوم ما تدبل راح يدوسوك
••
بسأل حمار صوته ملعلع
مالك بتزعق و تبرطع
تكنش عاشق و مولع
قالى الحمير مش بنى آدمين لا فيها مشحط ولا مخلع
الكل بيشيل ولا يشكى ولا نفهم ازاى ندلع
••
سعات بفكر فى الأحوال و أسأل خيالى ألف سؤال
البحر لو قال للنجمة قلبى عشانك حن و مال
ولا الأسد ىادى النيلة بيحب لجل الحظ غزال
و فيل بيعاكس نملة و يقول ازاى الحال
و فرح كبير جوه الأوبرا جايبنله جحش يقول موال
دى أمور معقولة ولا خيالى ركبله خيال
••
جتلك يا باشا بشكوايا
نسانى كلبك نجوايا
رجعت بالعشرين حقنة و شكوتى لسه معايا
آه دى الكلاب ولا بلاش ابقى اشكرهولى يا مولايا
••
النار تزرغط و هى قايده
و الميه نايمه
و مش رايده
و سألت مين حايطفيها.. قالوا اللى قادها بدون فايده
••
القط شفته يلاعب فار
أنا قلت عفوك يا جبار
دا لعب ده ولا مراوغة.. ولا الطبيعة غاوية هزار
••
طاووس فى مشيه بيتمايل
و نافش الريش الهايل
طب لو سيادته بدون الريش.. راح يبقى كلب حاله مايل
••
يا تعبان جلدك غالى القيمة
النسا لبسوه لجل الزينة
منه الجزمة و منه الشنطة.. و بقيت تحفة فى الڤترينة
آه لو جلدك روحك فيه بصة منك تُوَدّى أثينة
و صرخة و خضة و مية تأليمة
••
ٳلّة و عاملّى ألاطة
و عاملّى فيها سقراط حلاقه عمل راسه قرعة..
و حطلى فيها زر بطاطة
••
لقيت عجوز كحيان
حوليه زفة و فستان
أتاريه مولد و عروسته حلاوة م الدكان
••
وز و بط و حمام و فريك
ف حلم طويل ٳلهى يديك
ورك حقيقى و الباقى مش ليك
••
بخيل و كل ما يزرنى يجيبلى معاه صورة خروف
و هو ماشى يمأمأله و يقولّه ياللا أنا شايف ضيوف
••
سكران و شايف دكان هناك
لبس و راحل له لآه هناك
رجعله تانى لآه هناك
و لما فاء ملأهوش هناك
