ديوان بهجة الروح : لبنت الطبيعة الدكتورة مرفت محرم: المسحراتى

المسحراتى

المسحراتى

يارب فى الشهر الكريم اهدى العاصى و الغشيم

و توب علينا برحمتك دا أنت الكرم و أنت الكريم

اصحى يا ريس عبد الكريم أنا من اللى جوايا بقول

مهما اللى فيّ راح يطول و سحورى مكتوب فى الزمن؛

طورشى و فلافل ويّا فول

اصحى يا سيدنا عَب جليل

بنادى مصر قالتلى مين قلت اللى عاشقك من سنين

و معايا مفتاح الزمن

فاكرانى يامو الطيبين وَحّد يا عم الشيخ ياسين

ياسلام يا بلدى علّكان و انت زعيمة من زمان

ولا حد يكسر كلمتك يهز بابك و الحيطان

اصحى و فَوّق يا سليمان

أنا قولى بلسم ع الشهيد اللى بدمه جبنا عيد

ولا حد حايجيبنا لوره مادام بنتحدى الحديد ..

فُوق بقى يابو الشهيد

آهين يا حارة ع الزمن و ع الكريم اللى اندين

و من العليل اللى امتلا و رغيفنا لو طاله العفن

اصحى يا عم الشيخ حسن

أنا بضرب الطبلة بعصا يمكن يفوق اللى عصا..

و بلدنا تفرد أمرها

و نتوب بقى من القرفصة .. افهم يا شيخ المرقصة

صحى شبابك صحصحيه.. ٳديله بُأ و فوقيه

قوليله قطرك لو مشى فاتك.. و عمرك ماتلاقيه

اصحى يا حاج الشيخ نبيه
......................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/08/01/234043.html