حكم النسا
Posted on by الكاتبة الأديبة الدكتورة مرفت محرم ـ عضو اتحاد كتاب مصر
حكم النسا
الفرخة بتعلى الآدان .. و بقت زعيمة فى الميدان
و الديك حدانا حضرته .. نايم على سطح الجيران
ما احنا بقينا فَرنجة
و طباعنا آخر بهرجة
و الكلمة صبحت للنسا.. من يوم مادخلوا البرلمان
و ف كفر بلاص الحمير .. اللى متعرفش السرير
عملوا عوالى شيخ الغفر .. و بهانة بنت أحمد غفير
ح تقول كلام؟
ماهش كلام
ولاهيش عجيبة يا جدع .. ما العمدة أم الواد بكير
واللى بتكتب فى الكتاب.. مأذونة من بين الشباب
ولاليها قفطان تلبسه .. ولا عمة م اللى بالجناب
دا شكلها زى العسل
و البصة لخدودها غزل
و ساعات تزرغط فى الفرح.. هما النسا ليهم عتاب
يا خوفى ياولاد الحلال .. ياللى فى ايدكم كل حال
لنلاقى يوم صنف الرجال .. قاعدين يشيلوا فى العيال
و امامنا يبقى سيدة .. و قضانا فيه سيدة
حتى الحكومة مأيدة .. و جايبه قانون خلع الرجال
و ڇيهان تبقى ريسة .. و يبقوا النسا حكموا الرجال
